Luk 17 | YomNWM | STEP | Yesu wukamba minlonguki miandi : —Ziphukumunu zilendi kambu ko vayi mabienga kuidi woso wuntotukidilanga ziawu.

Luke 17

Khadulu va khatitsika zikhombo

(Matayi 18.6-7 ; Malako 9.42)

1 Yesu wukamba minlonguki miandi :

—Ziphukumunu zilendi kambu ko vayi mabienga kuidi woso wuntotukidilanga ziawu. 2 Bulutidi mboti bankanga ditadi diodi bannikinanga makundi mu tsingu, ku nloza mu mbu ayi mu diambu kabika vodisa, wumosi mu banababa, masumu. 3 Diawu lulubuka !

(Matayi 18.21-22)

—Enati khombꞌaku vodidi masumu, buna bika wuntubidila. Ayi enati baludimavanga buna bika wunlemvukila. 4 Ayi buba kuandi ti tsambudi di zikhumbu kavodidi masumu kuidi ngeyo mu lumbu kimosi, ayi tsambudi di zikhumbu kiza tubila ti : “mbaludi khadulu”. Buna bika wunlemvukila.

Minu kidi banga ki dikundi di mutalide

(Matayi 17.20)

5 Mimvuala mikamba Pfumu Yesu :

—Wutubuela minu.

6 Buna Pfumu Yesu wuba vutudila :

—Bukiedika ti minu kieno, ka diambu ko kidi banga buididi dikundi di mutalide ^{▼▼Dikundi di mutalide : diawu dikundi dilutidi keva mu makundi moso. Tala Matayi 17.20.}, nganu lulenda tumina nti wuna ti : “Vuzuka ayi yenda kikuni mu mbu” buna muna yina thangu wufueti kulutumukina.

Bisadi bikambulu mfunu

7 —Nani buna luidi widi ayi kisadi kiandi kinkunanga voti kinsunganga bibulu, kikunkambanga bu kabedi ku zitsola ti : “yiza nsualu ayi vuanda nsualu va meza ?” 8 Keti kafueti kunkamba theti ti : “ndambila bidia, vuata minledi mi kisalu ayi thudila bidia va meza nate ndimanisa dia ayi nua ; bosi ngeyo mamvaku wudia ayi wunua ?” 9 A Buevi pfumu kavueti vutudila kisadi kiandi matondo mu diambu kavengi bumboti momo katumunu e ? Nana ! 10 Buawu bobo kuidi beno mamveno. Bu luela mana vanga momo lutumunu buna bika luba tuba : “tuidi kaka bisadi bikambulu mfunu, tuvengi kaka momo tutumunu.”

Yesu wubelusa dikumi di batu baba buazi

11 Buna wulembo yendi ku Yelusalemi, Yesu wuviokila ku Samali ayi Ngalili. 12 Buna weka va difula di buala bumosi, kuna dikumi di batu babelabuazi bandengana. Thama batelimina 13 ayi bayamikina mu mbembo yingolo ayi batuba :

—A Pfumu Yesu, bika wutumona kiadi !

14 Yesu bu kaba mona, buna wuba kamba :

—Yendanu lukimonikisa kuidi banganga Nzambi.

Mu thangu baba kuenda mu nzila, bazimbukila batumbulu vedila ^{▼▼batumbulu vedila : voti babelukidi kuawu.}. 15 Wumosi mu bawu bu kamona ti belukidi, wuvutuka, wukembisa Nzambi mu ndinga yingolo. 16 Wufukama va malu ma Yesu, wuyinika zizi kiandi va tsi ayi wumvutudila matondo. Vayi mutu beni wuba muisi Samali.

17 Buna Yesu wunyuvula :

—Keti dikumi divedusulungu e ? A kuevi kuidi divua dinkaka ? 18 Buna kadi mutu kasi yindula ko mu vutuka ayi vutudila Nzambi matondo botula kaka nzenza yayi e ?

19 Buna Yesu wunkamba :

—Telama ayi yenda kuaku ; minu kiaku kibelusidi.

Buevi buela kuizila Kipfumu ki Nzambi

20 Bafalisi bayuvula Yesu mu diambu di zaba kani lumbu mbi kiela kuiza Kipfumu ki Nzambi. Niandi wuba vutudila :

—Kipfumu ki Nzambi bu kiela kuiza kilendi monu mu meso ko. 21 Ayi balendi tuba ko : “Tala, kidi kuaku” voti “tala kidi kuna” bila luzaba mboti ti Kipfumu ki Nzambi kidi va khatitsikꞌeno.

22 Bosi wukamba minlonguki :

—Bilumbu biela kuiza biobi luela bela tsatu yi mona, banza lumbu kimosi ki muana mutu vayi lulendi kimona ko.

(Matayi 24.23-28)

23 —Buna bela kulukamba : “Tala Klisto widi kuaku” voti “tala widikuna”. Buna kadi ba kuenda ayi kadi ku balandakana. 24 Bila banga lusiemo lueta totukila mu diyilu ayi lueta kienzudila tona tsongi yimosi nate tsongi yinkaka yi diyilu, buna buawu bobo buela bela muana mutu mu lumbu kiandi. 25 Vayi kafueti tuama mona ziphasi ziwombo ayi kafueti tuama lozu kuidi batu ba tsungi yayi.

(Matayi 24.37-41)

26 —Mambu momo maba mu thangu yi Nowa mawu mela buela ba mu bilumbu bi Muana Mutu. 27 Bila batu badia, banua, bakuelana, bakuedisa nate mu lumbu kioki Nowa kakota mu masuwa. Buna bosi nkuka yi nlangu yiyiza, ayi yimana ku babunga. 28 Banga kuandi bubela mu bilumbu bi Loti : batu badia, banua, basumba, basumbisa, bakuna batungisa. 29 Vayi mvula yi mbazu ayi yi sufele yinoka ayi yimana ku babungamu lumbu kioki Loti katotuka mu Sodoma. 30 Buawu bobo buela bela mu lumbu kioki Muana mutu kela monika. 31 Mu lumbu kina, enati mutu widi ku yilu muanzu vayi widi ayi bima biandi mu nzo buna kabika kuluka muingi kenda bongi biawu ; bobuawu woso wela batakana ku zitsola kabika buela vutuka ku nzo andi. 32 Bika lutebukila nketo wu Loti moyo. 33 Woso wela tomba vukisa luzingu luandi, wela luzimbisa vayi wosowela luzimbisa wela luvukisa.

34 Bukiedika ndikulukamba, muna builu buna, batu buadi bela lekamfulu yimosi, wumosi mu bawu wela botulu vayi wunkaka wela siala. 35 Baketo buadi bela tuta mfufu va kimosi, wumosi mu bawu wela botulu vayi wunkaka wela siala. [ 36 Babakala buadi bela ba ku zitsola, wumosi mu bawu wela botuluvayi wunkaka wela siala ^{▼▼Buku voti nzila yayi yikambulu mu minkanda minkaka. Tala mu Matayi 24.40.}.]

37 Buna minlonguki minyuvula :

—A Pfumu, kuevi kuela viokila mambu momo e ? Niandi wuba vutudila :

—Koso kuidi mvumbi, kuawu kuidi bibala.